नमस्कार शेतकरी मित्रांनो, आज दिनांक २2 जानेवारी २०२६. आज दुपारनंतर राज्याच्या हवामानात मोठा बदल जाणवण्यास सुरुवात झाली आहे. अनेक ठिकाणी आभाळ दाटून आले आहे. हे ढगाळ वातावरण केवळ आजपुरते नसून जानेवारी महिन्याच्या शेवटच्या आठवड्यापर्यंत कायम राहणार आहे. तसेच महिन्याच्या शेवटी काही जिल्ह्यांत पावसाच्या सरी कोसळण्याची शक्यता वर्तवण्यात आली आहे.
नेमका पाऊस कधी पडणार? आणि कोणत्या पिकांना याचा फायदा किंवा तोटा होणार? जाणून घेऊया सविस्तर अंदाज.
१. पुढील ४ दिवस कसे राहील वातावरण?
आज (२2 जानेवारी) दुपारनंतर राज्यात ढगाळ वातावरणाला सुरुवात झाली आहे.
- २२, २३ आणि २४ जानेवारी: या दिवशी पूर्व विदर्भ, पश्चिम विदर्भ, दक्षिण महाराष्ट्र, उत्तर महाराष्ट्र, कोकणपट्टी आणि खानदेश अशा सर्वच भागांत ढगाळ वातावरण राहणार आहे.
- या काळात ऊन पडण्याचे प्रमाण कमी असेल आणि आकाश ढगांनी आच्छादलेले राहील.
२. पावसाचा अंदाज: २७ ते ३० जानेवारी दरम्यान काय होणार?
शेतकरी मित्रांनो, २६ तारखेपर्यंत केवळ ढगाळ वातावरण असेल, पण त्यानंतर हवामान जास्त बिघडणार आहे.
- महत्त्वाच्या तारखा: २७, २८, २९ आणि ३० जानेवारी २०२६.
- पावसाची शक्यता: या कालावधीत, विशेषतः २८ आणि २९ जानेवारीला राज्यात पावसासाठी पोषक वातावरण तयार होईल.
- प्रभावित जिल्हे: उत्तर महाराष्ट्रातील नंदुरबार, धुळे, जळगाव, नाशिक तसेच अहिल्यानगर (अहमदनगर), पुणे, सातारा, सांगली, सोलापूर, कोल्हापूर आणि संपूर्ण कोकणपट्टी.
- पावसाचे स्वरूप: खूप मोठा किंवा सर्वदूर पाऊस पडणार नाही. मात्र, या भागांत तुरळक ठिकाणी पावसाचे थेंब पडतील किंवा हलक्या सरी येऊ शकतात.
३. वातावरण का बदलले? (Western Disturbance Effect)
हे वातावरण खराब होण्याचे मुख्य कारण म्हणजे ‘वेस्टर्न डिस्टर्बन्स’ (Western Disturbance).
- गुजरात, राजस्थान, पंजाब, हरियाणा, मध्य प्रदेश आणि उत्तर प्रदेश या राज्यांमध्ये २५ ते ३० जानेवारी दरम्यान हवामान बिघडणार आहे. तिथे काही ठिकाणी बर्फवृष्टी तर काही ठिकाणी गारपीट होईल.
- या उत्तरेकडील बदलांचा परिणाम म्हणून महाराष्ट्रात ढगाळ वातावरण आणि काही ठिकाणी पावसाचे थेंब पडणार आहेत.
४. पीक सल्ला: शेतकऱ्यांनी काय काळजी घ्यावी?
हे ढगाळ वातावरण आणि संभाव्य पाऊस काही पकांसाठी चांगला आहे तर काहींसाठी नुकसानकारक आहे.
✅ यांच्यासाठी फायदेशीर:
हरभरा: हरभरा पिकाला सध्या फुले लागत असतील, तर हे ढगाळ वातावरण फुलधारणेसाठी खूप पोषक आहे.
- वेलवर्गीय पिके: टरबूज, खरबूज, कारले इत्यादी पिकांसाठी हे वातावरण चांगले मानले जाते.
❌ यांच्यासाठी नुकसानकारक:
- द्राक्ष आणि डाळिंब: ढगाळ वातावरणामुळे सकाळी धुके (धुई) पडण्याची शक्यता आहे. हे धुई/धुकं द्राक्ष बागा आणि डाळिंब बागांसाठी अत्यंत घातक ठरू शकते. त्यामुळे शेतकऱ्यांनी आपल्या बागेत बुरशीनाशकाची फवारणी करण्याचे नियोजन ३० तारखेपर्यंत करावे.
- तंबाखू: जत, निपाणी आणि कर्नाटक सीमाभागातील तंबाखू उत्पादक शेतकऱ्यांनी लक्षात घ्यावे की, २८-२९ तारखेला वातावरण खराब होणार आहे. त्यामुळे काढणीचे नियोजन त्याआधी करावे.
🧱 वीट भट्टी चालक: वीट उत्पादकांनी जास्त घाबरून जाण्याचे कारण नाही, कारण मुसळधार पाऊस पडणार नाही. फक्त २८ ते ३० तारखेच्या दरम्यान तुरळक थेंब पडू शकतात, त्यानुसार विटा झाकण्याची व्यवस्था करावी.